Cobalt banksiz muddatli toʻlov shartnoma olish: boʻlib toʻlash shartlari va grafigi
UzAuto Motors Chevrolet Cobaltni foizsiz va bank ishtirokisiz boʻlib toʻlashga sota boshladi. Shu yoʻl bilan zavod halol nasiyaga boʻlgan talabni yopmoqchi va 2026-yilda keskin tushib ketgan Cobalt savdosini koʻtarmoqchi.
Статья доступна на русском языке.
2026-yil 7-oktabrdan UzAuto Motors Chevrolet Cobaltni banksiz muddatli toʻlovga sota boshlaydi.
Bu foizsiz muddatli toʻlov: Cobalt ustamasiz, lekin chegirmasiz sotiladi. Boshlangʻich toʻlov kamida 50%, muddat 2 yil. Demak, eng kam oylik toʻlov 3 252 083 soʻm boʻladi.
Bank krediti bilan solishtirsak, 2 yilda 10 mln soʻm ortiqcha toʻlov yillik 13,5 foizlik stavkaga toʻgʻri keladi.
2026-yilning birinchi yarmida Oʻzbekistonda Cobalt savdosi 2025-yilning shu davriga nisbatan 39,4 foizga kamaydi. Iyuldan boshlab UzAuto Motors Chevrolet Cobalt savdosini faol ragʻbatlantira boshladi: imtiyozli avtokreditlar, chegirmalar, bank orqali muddatli toʻlov paydo boʻldi, endi esa bank ishtirokisiz foizsiz muddatli toʻlov.
Cobalt toʻlov grafigi va toʻlov jadvali: foizsiz muddatli toʻlov shartlari
| Chevrolet Cobalt Style MCM, 156 100 000 soʻm | |
|---|---|
| Boshlangʻich toʻlov va muddat | Oylik toʻlov |
| 50% · 78 050 000 soʻm 24 oy | 3 252 083 soʻm |
| Chevrolet Cobalt Midnight MCM, 165 200 000 soʻm | |
|---|---|
| Boshlangʻich toʻlov va muddat | Oylik toʻlov |
| 50% · 82 600 000 soʻm 24 oy | 3 441 667 soʻm |
Cobaltni muddatli toʻlovga banksiz olish: hujjatlar, shartnoma va xarajatlar
Avtosalonga pasport, my.gov.uz login va paroli hamda boshlangʻich toʻlov uchun pul bilan borish kerak. Boshlangʻich toʻlov 50 foizdan koʻp boʻlishi mumkin, ammo muddat baribir 24 oydan oshmaydi.
Salon kredit tarixini bepul tekshiradi va u ijobiy boʻlsa, toʻlov grafigi bilan shartnoma tuzadi.
Mashinaga taqiq qoʻyiladi. Agar nikoh shartnomasida boshqacha tartib belgilanmagan boʻlsa, xaridorning turmush oʻrtogʻi salonga kelib rozilik berishi kerak. Xaridor turmush qurmagan boʻlsa, bu talab qilinmaydi.
Boshlangʻich toʻlovdan tashqari sugʻurta va taqiqni rasmiylashtirish uchun ham pul toʻlanadi. Boshlangʻich toʻlov 50 foiz boʻlsa, sugʻurta Style MCM uchun taxminan 1,6 mln soʻm, Midnight MCM uchun taxminan 1,7 mln soʻm boʻladi. Boshlangʻich toʻlov qancha koʻp boʻlsa, sugʻurta shuncha arzon.
Taqiq notariusga bormasdan, salonning oʻzida rasmiylashtiriladi va taxminan 550 ming soʻmga tushadi.
Mashina darhol, raqamsiz beriladi. Uni 10 kun ichida roʻyxatdan oʻtkazish kerak. Davlat raqami narxi muddatli toʻlovga kirmaydi.
Shartnoma tuzilgan oy toʻlov grafigiga kirmaydi. Masalan, shartnoma 9-oktabrda tuzilsa, birinchi toʻlov 15-noyabrgacha, keyingilari esa har oyning 15-sanasigacha qilinadi. Pul salon kassasiga, kassa boʻlmasa, bank orqali toʻlanadi.
Sherxon Nusratilloyev videosida aytishicha, shartnomaga koʻra toʻlov kechiktirilgan har bir kun uchun 100 ming soʻmdan jarima olinadi.
Cobalt boʻlib toʻlash shartnoma olish: foizsiz kredit bilan farqi
UzAuto Motors 2026-yil 30-sentabrda Cobaltga 10 mln soʻmlik chegirmani qaytardi. Chegirma bilan Style MCM narxi 146 100 000 soʻm, muddatli toʻlovda esa u prays narxida sotiladi.
Xaridor 78 050 000 soʻm toʻlaydi, chegirmali narxgacha unga 68 050 000 soʻm yetmaydi. Bu pulni u zavoddan qarzga oladi va ikki yilda 78 050 000 soʻm qaytaradi. Shundan 10 mln soʻm ortiqcha toʻlov va yillik 13,5 foiz stavka chiqadi.
2026-yil avgustida banklarning jismoniy shaxslarga bir yildan uzoq muddatga bergan kreditlari boʻyicha oʻrtacha stavka yillik 21,2 foiz edi. Bankda ham Cobalt chegirmasiz sotiladi, shuning uchun xaridor bank foiziga yana oʻsha 10 mln soʻmni qoʻshadi.
Kapitalbankning Cobalt uchun foizsiz muddatli toʻlovida ham xaridor chegirmani yoʻqotadi, lekin muddat qisqaroq: 50% boshlangʻich toʻlovda 11 oy, 60 foizda 15 oy va 65 foizda 17 oy. Xuddi shu hisob boʻyicha stavka yillik 27-28 foizga chiqadi.
Cobalt halol nasiya va islomiy moliyalashtirish
Islomiy moliyalashtirishda foiz oʻrniga narxga qatʼiy ustama qoʻshiladi. 2026-yil may oyida ayrim dilerlar Cobaltni shu usulda, bank orqali halol nasiya savdoga chiqargan.
Chevrolet Cobalt savdosi 2026-yilda
2026-yilning birinchi yarmida Oʻzbekistonda 40 936 ta Cobalt sotildi, bir yil oldin esa 67 580 ta. Shu davrda 82 951 ta mashina ishlab chiqarildi, bu mamlakat ichida sotilganidan ikki baravar koʻp: qolganlari eksportga ketgan yoki omborda qolgan.
Banksiz muddatli toʻlov zavod iyuldan beri Cobalt savdosini qoʻllab-quvvatlayotgan navbatdagi dastur boʻldi. Undan oldin toʻrtta bankda imtiyozli avtokreditlar va 0 foizli muddatli toʻlovlar paydo boʻlgan, chegirma esa ikki marta eʼlon qilingan.
Birinchi chegirma 3-avgustdan 10-sentabrgacha amal qildi. Avgustda 12 245 ta Cobalt sotildi, bu birinchi yarim yillikdagi oʻrtacha oydan qariyb ikki baravar koʻp, lekin chegirma boʻlmagan 2025-yil avgustidagidan atigi 188 taga koʻp.
30-sentabrda UzAuto Motors chegirmani qaytardi va oʻsha kuni vagonlardagi Chevroletlar eksportdan sotilmay qaytayotgani haqidagi xabarlarni rad etdi.
Kompaniya chegirmalardan keyin talab oshgani, avtovozlar yetishmagani va mashinalarning bir qismi dilerlarga temir yoʻl orqali yuborilganini maʼlum qildi.
UzAuto Motors 2020-yilning bahori va yozida ham oʻz dilerlari orqali avtomobillarni muddatli toʻlovga sotgan, oʻshanda dasturga Cobalt ham kirgan edi.
